Шоми 8 августи соли 2025 дар боғи Парчами давлатӣ бахшида ба Рӯзи варзишгарон чорабинии тантанавӣ бо иштироки раиси ноҳия Гулзода Зафар Шамсуддин баргузор гардид.
Дар чорабинии идона варзишгарон, мураббиён, кормандони соҳаи тарбияи ҷисмонӣ, роҳбарони муассисаҳои варзишӣ, собиқадорон ва фаъолони соҳа ширкат варзиданд.
Зимни суханронии худ раиси ноҳия варзишгарон ва кулли фаъолони соҳаи варзишро бахшида ба Рӯзи варзишгарон табрику таҳният гуфта, аз таваҷҷуҳи давлату Ҳукумат ба рушди варзиш ва дастгирии пайвастаи варзишгарон ёдовар шуданд. Таъкид гардид, ки Пешвои миллат муҳтарам Эмомалӣ Раҳмон рушди соҳаи варзишро яке аз самтҳои афзалиятноки сиёсати иҷтимоии кишвар арзёбӣ намуда, барои солимии насли наврас ва ташаккули тарзи ҳаёти солим пайваста тадбирҳои судманд меандешанд.
Варзиш дар ҳар давру замон қосиди сулҳу дӯстӣ ва муаррификунандаи ҷаҳони маънавию солимии миллату давлат мебошад. Бо шарофати сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон варзиш дар кишвари соҳибистиқлоламон ҳамчун ҷузъи муҳими таркибӣ ва пураҳамияти арзишҳои фарҳангӣ гашта, рушду инкишоф додани он дар байни табақаҳои васеи омма яке аз омилҳои муҳими солимгардонии ҷомеа ба ҳисоб меравад.
Ҳамин аст, ки бо ташаббусҳои дурбинонаи Пешвои варзишпарвар муҳтарам Эмомалӣ Раҳмон ҳамасола 10 август дар кишвари азизамон Рӯзи варзишгарон таҷлил карда мешавад.
Дар идомаи чорабинӣ як қатор собиқадорон, варзишгарони фаъол, ғолибони мусобиқаҳо, мураббиёни соҳибтаҷриба, ҷоизадорони сатҳи ҷумҳуриявӣ, байналмилалӣ ва кормандони муассисаҳои варзишӣ бо сипосномаҳо ва туҳфаҳои хотиравии мақомоти иҷроияи ҳокимияти давлатии ноҳия сарфароз гардонида шуданд.
Қисмати дигари чорабиниро барномаи фарҳангию ҳунарӣ, ки дар доираи таҷлили ҷашни 34 солагии Истиқлоли давлатӣ ва нақшаи чорабиниҳои мақомоти иҷроияи ҳокимияти давлатии ноҳия аз ҳисоби бахшҳои ҷавонон ва варзиш, сабти асноди ҳолати шаҳрвандӣ, шуъбаи Агентии нафақа, бойгонии байниидоравӣ, корхонаи дӯзандагӣ ва идораи тоҷиксуғурта таҳти унвони «Шукӯҳи Истиқлол» сомон дода шуда буд, шукӯҳу шаҳомати тоза бахшид.
